چاغيريش: قوم شهرینده، حضرت معصومه­نین حرمیندهتحصن ائده­جه­ییک

پنجشنبه,۳ خرداد ۱۳۸۶

آنا دیلیمیز رسمی اولسون ایسته­گی ایله خورداد آی­نین ۴-و جوما گونو سحردن آخشاما دک “سولدوز شهیدلرینین ایل دؤنومونده” قوم شهرینده، حضرت معصومه­نین حرمینده تحصن ائده­جه­ییک.

هر زاددان اؤنجه لازیمدیر قوم شهری ایله آرتیق تانیش اولاق (ایلکین تانیشلیق تمام شهرلرده چالیشماغا گؤره لازیمدیر). قوم شهری آذربایجان-ین ان اؤنملی و دوغروسو ایلک سيياسی-مذهبی (دینی) مرکزی­دير. قوم شهرینده بير اؤزلليکلر وار کی باشقا شهرلرده بو اؤزلليکلری گؤره بيلميريک:

۱- قوم شهرينين يوزده ۶۵-ی تورک­لرديلر کی بو تورک­لر نيروگاه منطقه­سينده توپلو شکيلده ياشاييرلار و قوم-دا چوخ اؤنملی روللاری وار. تورک تعصصوبو بو شهرده هله اؤزونه يئر آلير و نئچه يوز ايلليک تورک-فارس ساواشی اوردا ايندیده جريان­دادير. فارسلار نیروگاه منطقه­سینه و تورکلره گؤره چوخ منفی باخیشلاری وار و تورکلرین اوردا اولمادیغین ایسته­ییرلر. آنجاق بو تورکلر نئچه یوز ایلدیر کی بو یئرلرده واردیلار و قوم شهرینی اؤزلرینین شهری کیمی تانییرلا. قوم شهرینه کؤچنلرین چوخو دا ائله قوم-ون تورک اولان یئرلرینده یئرلشیرلر و توپلوم باخیمیندان بیرگه­لیغی قورویورلار.

۲- قوم شهری ايران-ين ان اؤنملی مذهبی شهری­دير و اوردا سنتی باخيش هله کی هله­­دیر اؤزونه اؤنملی بیر یئر آلیر. تبریز، بیناب، اردبیل و آذربایجان-ین قوم-دان سووای باشقا شهرلری مذهبی باخیمیندان اؤز نقش­لرین الدن وئریبلر و آذربایجانین مذهبی-سییاسی چالیشمالاریندان قومدان سووای گوجلو بیر یئری یوخدور. آذربایجانیمیزان باشا-باشینا ماللا قومدان یوللانیر. آذربایجان طلبه­لریده ائله بو شهرده سییاسی باخیمیندان باشقا شهرلره گؤره چوخ چوخ گوجلودولر.

۳- قوم-دا ۹۰ اؤلکه­دن دين اؤيرنجی­سی واردير. بو طلبه­لر اؤز اؤلکه­لرينين نوماينده­سی اولاراق قومدا ياشاييرلار. بو طلبه­لر بیر گون اؤز اؤلکه­لرینه قاییتاندا گؤردوکلرینی اوردا سویله­ییب و بیر چوخونلوغو سییاست اوزرینده گوجلو ایشلر آپاراجاقلار. بئلنچی بیر دوروم آذربایجان-ین باشقا شهرلرینده یوخدور.

۴- دونيا جاسوسی اؤرگوتلرین اویه­لری (عضولاری) بو شهرده متمرکز اولوب و چالیشیرلار. ايران-ين نبضی بو شهرده وورولور: تهران بئین اولسا قوم اورک­دیر! ۷۰-دن چوخ اؤلکه جاسوسی سئرويسین بو شهرده فعال­ اولدوغو بو ادعایا هن دامغاسی وورور. بو اؤلکه­نین قوم دامغاسی وورولمایان سییاسی ایشی یوخدور و بو اؤلکه­نین جومهور باشقانلاری و رهبرلری ده قوم شهرینه باش ووروب شرعی تأیید آلیب سونرا بیر ایشی گؤررلر. قوم دونیا اوزرینده ان مشهور شهرلردن بیری­دیر.

۵- بو شهرده ايران-ين هر يئريندن کؤچمن وار، آنجاق، تورک­ کؤچمنلری تئهران کیمی بو شهرده چوخونلوغو یییه­له­نیرلر. بو شهر مذهبی شهر اولدوغو اوچون تئهران اشرافییت و پولچولوق کولتورو بوردا اؤزونه آزینلیق یئرین آلیر و ملت مذهب و سییاست آچیسیندان دونیایا باخیرلار. کؤچمنلرده قوم شهرینی مذهبی دورومونا گؤره سئچیرلر: نییه کی قوم شهرینین اقلیمی و مالی دورومونا هر کس دؤزه بیلمز.

۶- بو شهرین چيچيک اولدوغو اوچون ايلگی قورماق آساددير. تورکلرین توپلو شکیلده یاشاییشی و تعصوبلارینین اولدوغو بو ایلگی قورماغی آساددیریر. قوم شهری تهران-ا گؤره اسکی بیر شهردیر و بو شهرده اینسانی دوشونجه­لر و شهر یاشاییش کولتورو و ایجتیماعی دئورانماق کولتورلنیب. بو شهرین دورومونو و قایدالارین تانیساق، بو شهرده خبر یایماق و ایلگی قورماق و میللتی ایجتیماعی حرکتلره یؤنتمک راحاتجاسینا اولا بیلر.

۷- قوم-دا تربيت اولان حؤزه طلبه­لری اؤلکه­نین تمام شهرلرينه گئديب آراسيز ائتگی بوراخيرلار. بو بیر آیدین گئرچک­دیر کی بو اؤلکه­نین یوزده ۹۵-ی مذهب آچیسیندان دونیایا باخیرلار و لاییکلیک ادعاسی اولان کیمسه­لرین دوشونجه آلتلاریندا مذهب ائتگی­سین گؤرمک اولور. ایش برکه کئچندن آللاهی، ابلفضلی و علی­نی سسله­ییرلر! ائله بونا گؤره ده بو اؤلکه­نین یوزه ۹۰-دان آرتیغی هله کی هله­دی ماللا و دین اؤیرتمنیندن سؤز ائشیدیرلر. آذربایجان میللی حرکتینده طلبه­لرین و حؤزوی چالیشمالارین ان اؤنملی رولو و نقشی وار.

۸- تقلید مرجع­لرین توپلانتی­سینی یالنیز قوم شهرینده تاپماق اولار. اسکی داغیناق مذهبی فورما ایندی­کی دورومدا متمرکز فورمادا قوم-دا چالیشمادادیر و دینی دستورلار و دییشیکلر قوم شهریندن قایناقلارنیر. بو تقلید مرجع­لرینه بیزیم الیمیز چاتمیر؛ آنجاق طلبه­لر بو مرجع­لرین و آیت­الله­لارین حؤزوی کیلاسلاریندا و ائولرینده و جماعت نامازلارینین صفلرینده و … اونلارا اللری چاتیر و اونلارین فیکیرلرینده و دئدیغی سؤزلرینده ائتگی بوراخیرلار. بیز بو بؤیوک دینی آداملارا اؤز حاق سؤزلریمیزی یئتیرمک اوچون آراسیز ایلگی قورمامالییق و طلبه­لرده کومک آلاراق بو ایشی گؤرمه­لیییک (آشاغیدان اوسته – طلبه­دن آیت­الله­آ)! یانی بیز بیر ایشلر قومدا گؤرمه­لیییک کی طلبه­لر آذربایجان میللی (سییاسی-دینی-اقتصادی-اجتماعی-هنری-…) حرکتینه قاتیلسینلار و بو طلبه­لرین کؤمه­گی ایله اؤز ائتگی­میزی دین عالیم­لرینه بوراخاق.

۹- قوم شهری آذربایجان-ین سینیر و مرزی شهرلریندن بیری­دیر. بو شهر ده ائله قوروه، بیجار، آستارا، انزلی، اراک، همدان، قوشاچای، سولدوز، خانا، سویوق بولاق، بوکان، سونقور، و … باشقا سینیر شهرلر کیمی اؤنملی ساییلیر. بیز آذربایجان-ین باغیمسیزلیغین و اؤزگورلوغون سینیر شهرلردن باشلامالییق. قوم آزاد اولسا، تبریز آزاد اولاجاق! تهران آزاد اولسا، اردبیل آزاد اولاجاق! …

۱۰- حضرت معصومه­نین حرمی بو شهرده­دیر. حضرت معصومه ایمام­ ریضا-نین بیر آتادان و بیر آنادان اولان باجی­سیدیر و آذربایجانلی­لارین ایکینجی و البته یاخین زییارت یئریدیر. خوراسان قوزئیینده مشهد شهری آذربایجان سینیرلاریندا یئرلشمه­سه­ ده، قوم شهری بیزیمدیر و زییارته گئدن میللتیمیزه بئلنچی زییارت یئرلرینین اؤنملی اولدوغو بیزی بو شهرده چالیشماغا چوخ ماراقلی ائله­ییر. جمکران کی ایمام زامانا مونتسب اولان بیر مچیددیر، هر ایل میلیونلار آذربایجان-لینین زییارت یئریدیر و بو شهرده­دیر. بیزیم چوخلو دین عالیم­لریمیزین قبری بو شهرده دیر. آذربایجان-ین تاریخی بو شهرده یازیلیب و تبریز-قوم-نجف بیرلیگی دونیادا چوخلو ائتگی­لر بوراخیب.

۱۱- قوم شهرینده اولان طلبه­لرین چوخو بو رژیمدن راضی دئییل­لر و حوکومت ده بونو بیلیر. ائله بونا گؤره­ ده نئچه ایلدیر کی چالیشیر قوم شهرینی ضعیفلدیب و ائتگی­سین آلسین و نجفی گؤزه چاپسین! آنجاق، بو ایشه قادیر اولماییب. آیت­الله­لارین چوخو “ولایت فقیه” تئزی ایله موخالیفدیلر و اونو بیر بدعت کیمی گؤرورلر. شریعتمدارچی­لارین دا ساییسی کی بو رژیمدن راضی دئییل­لر بو شهرده آز دئییل و اؤنملی روللاری واردیر.

۱۲- تورک-فارس شیعه آچیسی بو شهرده فرقلی­دیر. تورک آیت­­الله­لاری دینی و مذهبی فارسلارا گؤره باشقا جوره دوشونورلر و بو فرقلیک طلبه­لره آیدین­دیر. تورک طلبه­لری تورک آیت­الله­لارین بینیرلر و فارسلار فارسلاری! تورک­لر دینی مسائلی چوخ رئال و لیبئرال دوشونور و مصالحه­یه یول وئریر، موسیقی­نی سئویر و اونا اؤنم وئریر. تانری­نی بشرین دوستو-یولداشی سانیر و بهشتی تبلیغ ائله­ییر، آنجاق فارس­لار چوخ رومانتیک و گوبود دینه باخیرلار و جهنمدن قورخودوللار. فارسلار کونسئرواتیر و محافظه­چی شکیلده دینه باخیرلار و دییشیکلره یول وئرمه­ییرلر، آنجاق تورکلر چوخ آزاد و اؤزگور فورمادا دینی دوشونوب اونا عمل ائدیرلر.

۱۳- قوم-دا چالیشماق ایرانیین هر یئرینده چالیشماق دئمک­دیر. قوم-ا هر نه ائتگی بوراخسان ائله بیل ایران-ین هر گوشه­سه­نیه و هر یئرینه ائتگی بوراخمیسان. بلوچ­لار، کوردلر، عرب­لر و … گؤزلری قومدادیر و اونلاردا بوراد گئدن پروسه­نی ایزله­ییرلر.

بو نئچه اؤزليک قوم شهرينه و يالنيز قوم شهرينه آييددير. تهران شهرينه ائتگی بوراخماغا گؤره و بو اؤلکه­ده اؤنملی ایش گؤرمک اوچون بو شهرده چاليشماق لازیمدیر. آتا-بابالار دئییبلبر “اششگی اوتوروب پالانی تاپتامازلار” ! آذربایجادا تهران و قوم سییاسی روللاری تبریز، اردبیل، و اورمو-دان چوخ-چوخ اؤنملی­دیر. تبریز سیخینتی­دا یاشاییر، هئچ بیر ریسانه یو شهرده یوخدور و سییاسی دورومدان خارابایا چئوریلیب، آنجاف، قوم شهری آذربایجان-ین چیرپینان سییاسی اؤره­گی اولا بیلر. قيسساجا دئسک: آذربایجان میللی حوکومتینین کليدی قوم شهرينده­دير! (تهران کلیدی­ ده قوم شهرینده­دیر، قوم-لا تهران-ی آلماق اولار و آذربایجان-ی اؤزگور ائتمک اولار!)

ائله بو سایدیغیمیز اساس­لارا گؤره بو ایل آذربایجان میللی حرکتینین تئهران و قوم قولو و بیر سیرا باشقا شهرلرین چالیشقانلارینین نظری ایله تصمیم توتموشوق:

خورداد آی­نین ۴-و “سولدوز شهیدلرینین ایل­دؤنومو” جوما گونو حضرت معصومه­نین حرمینده تحصن و اعتکاف ائلییک و اؤز آنا دیلیمیزین رسمی اولماغینی ایستییک.

حضرت معصومه­نین حرمینین سئچیلمه­سی بیر سیرا علت­لره گؤره­دیر:

۱- بو حرمه توخونا بیلمزلر و بوردا بیر کیمسه­نی تاپدییا بیلمزلر!!؟؟ بو ایشی گؤرسه­لر شاه حوکومتینه چئوریلیب اؤزلرینه قوبو قازمیش اولارلار. نه یاخچی که وروسونلار، ازسینلر و حرمین حؤرمتینه توخونسونلار و اؤز باطینلرین ظاهیرده گؤسترسینلر.

۲- بو رژیم آذربایجان میللی حرکتینین چالیشقانلارین لاییک، کافر و بی­دین گؤرستمک ایسته­ییر. بو ایش ایله بیز بو دامغانی پوزوب اؤزوموزو میللتیمیزین بیر پارچاسی کیمی مذهبه، و دین اصوللارینا ایناندیغیمیزی سویله­یه­ریک. بابک قالاسیندا بیزه “شراب ایچیب کئفله­نیب اویناشماغا گلیب­لر!” دئییرلر، آنجاق حضرت معصومه­نین حرمینده بو سؤزو هئچ آغیزلارینا گتیره بیلمزلر. بو حرمده بیزدن قاباق­دا بیر سیرا تحصصون­لار اولوب کی بونلار هئچ بیر ایش گؤره بیلمه­ییب!

۳- حرمین ایچینه گیریب زریحین دؤره­سینده یئره اوتوروب تحصن ائلییندن سونرا قاپیلاری باغلاسالاردا ریسانه­لرین قولاغینا یئتیره­جک و اونلار نئچه مین آدامین اوردا اولدوغونو بیله­جکلر. حرمین قاپیلارین جوما گونو سهردن ده باغلاسالار حرمین اؤنونده یئره اوتوروب اوردا تحصن ائلییه بیلریک. آنجاق هر زاددان اؤنجه تمام ریسانه­لره خبر وئریب بو ایشین اولماسین سویله­مه­ییمیز لازیمدیر.

۴- اونلار کی دئییرلر بیز اؤز شهرلریمیزده تظاهرات ائله­مه­لییک خوردادین بیرینده فورصت­لری وار. خوردادین بیری “فریدون ابراهیمی”نین (آذربایجان میللی حوکومتینین ایلکین شهیدلریندن بیرینین) شهادت گونودور. بو گون تبریزده نئچه شهیدیمیز اولوب و “آذربایجان شهید گونو” آدلانیب. شهرلرده تظاهرات ائله­مک ایستیینلر خوردادین بیرینده تظاهراتا چیخا بیلرلر.

۵- خوردادین ۴-و جوما اولدوغو اوچون راحاتجاسینا هاممی گله بیلر و ایداره­لرین تعطیل اولدوغو اوچون مرخصی آلماق لازیم دئییل و بیلینمز کی کیملر بو تحصصونا قاتیلیبلار.

۶- تحصصونو سحر چاخیندان آخشاما دک ایدامه وئرجه­ییک. هر کس قوم شهرینه یئتیردی گئدیب حرمه و زریحین دؤره­سینده و یا حرمین بیر گوشه­سینده اوتوراجاق، آخشاما دک گلنلر ائله بو ایشی گؤره­جکلر، آخشام اذانینندان سونرا ناماز قیلیب هاممی ائشییه چیخیب خییابانا چیخاجاق و اؤز ایستکلرین هارایلایاندان سونرا هره اؤز ائوینه ساری قاییداجاق.

۷- هاممینین الینده چیچیک بیچیملی قرآن اولماغی و نوحه دیلی ایله حضرت معصومه­ ایله دانیشماغی چوخ گؤزل و ماراقلی اولا بیلر.

یا حضرت معصومه گلمیشیک قوما زییارته
دیلیمیزی دینیمیزی آلانلاردان شیکایته
یوردوموزون توپراغینین تالاندیغین حیکایته
خبر وئرک ائرمنی­لر یاراددیغی جیینایته

آت بئلینده ایسلام یایان تورک اوغلو تورک بیز اولموشوق
محمده، فاطیمه­یه، علی­یه قوربان اولموشوق
موسلمانلار سایی­سیندا هاممیدان چوخ بیز اولموشوق
مچیدلرین گونبزینده آی-اولدوزلار بیز قویموشوق

جدین حوسئینین حرمین کربلادا بیز تیکمیشیک
قارداشیوین زریحینه قیزیل نیگاره وئرمیشیک
ایندی گوناهیمیز ندیر واللاه داها بیز بئزمیشیک
دیلیمیزده دانیشماغا سنه توسل ائتمیشیک

سوزون سونوجو؛ اوسته­کی فورمادا:

آنا دیلیمیز رسمی اولسون ایسته­گی ایله خورداد آی­نین ۴-و جوما گونو سحردن آخشاما دک “سولدوز شهیدلرینین ایل دؤنومونده” قوم شهرینده، حضرت معصومه­نین حرمینده تحصن ائده­جه­ییک.